ITന്യൂഡൽഹി: വ്യക്തികളുടെ സാമ്പത്തിക ഇടപാടുകൾ നിരീക്ഷിക്കുന്നതിന് ആദായനികുതിവകുപ്പിനെ പ്രാപ്തമാക്കുന്ന പുതിയ സോഫ്റ്റ്‌വെയർ കേന്ദ്രസർക്കാർ പരീക്ഷിക്കാനൊരുങ്ങുന്നു. കള്ളപ്പണമിടപാടുകൾ കൃത്യമായി നിരീക്ഷിക്കുന്നതിന്റെ ഭാഗമായിട്ടാണ് പദ്ധതി.
ഇൻകംടാക്സ് ബിസിനസ് ആപ്ലിക്കേഷൻ പെർമനന്റ് അക്കൗണ്ട് നമ്പർ(ഐ.ടി.ബി.എ.-പാൻ) എന്നപേരിൽ ധനമന്ത്രാലയം രൂപപ്പെടുത്തിയ സോഫ്റ്റ്‌വെയർ അതിന്റെ അവസാനഘട്ടപരീക്ഷണത്തിലാണ്. രാജ്യത്ത് പാൻ നമ്പർ ഉപയോഗിച്ചുനടത്തുന്ന എല്ലാ ഇടപാടുകളുടെയും വാർഷിക സ്ഥിതിവിവരക്കണക്ക് ആദായനികുതിവകുപ്പ് ഉദ്യോഗസ്ഥർക്ക് കൃത്യമായി ലഭിക്കുന്നവിധത്തിലാണ് ഇതു സംവിധാനംചെയ്തിരിക്കുന്നത്.
ധനകാര്യമന്ത്രാലയം പുതിയ സംവിധാനം ഈമാസം അവസാനത്തോടെ പ്രവർത്തനക്ഷമമാക്കുമെന്നാണു കരുതുന്നത്. 48 മണിക്കൂറിനുള്ളിൽ പുതിയ പാൻ കാർഡുകൾ ലഭ്യമാക്കുന്ന സംവിധാനവും ഇതോടൊപ്പം ആവിഷ്കരിക്കുന്നുണ്ട്. നിലവിൽ അപേക്ഷനൽകി 15 ദിവസത്തിനു ശേഷമാണ് പാൻകാർഡ് കിട്ടുന്നത്.